لژنەیا خواندنا بلند یا پەرلەمانی سەرەدانا زانینگەها ئەمریکی یا کوردستانێ کر
دهۆک، هەرێما کوردستانێ – ١٧ی تیرمەهێ، ٢٠٢٠ – شاندەکا لژنەیا پەروەردە، خواندنا بلند و لێکۆلینێن زانستی یا پەرلەمانێ کوردستانێ، پێکهاتی ژ گولستان باقی و هەلز ئەحمەد، ب سەرۆکاتییا د. عەبدلسەلام دۆلەمەری سەرەدانا زانینگەها ئەمریکی یا کوردستانێ کر و ژ ئالییێ د. نزار نوعمان، راگرێ گشتی یێ زانینگەهێ و هەژمارەکا سەرۆکپشکێن وێ ڤە پێشوازی لێ هاتە کرن.
د چوارچووڤەیێ سەرەدانێ دا، شاندا مێهڤان دلخوەشییا خوە ژ کار و بزاڤێن زانینگەها ئەمریکی یا کوردستانێ یێن مسۆگەرکرنا ئاستێ بلند یێ خواندنێ زێدەباری قەیرانا ساخلەمییێ راگەهاند و پابەندبوونا وێ ب بریارێن وەزارەتا خوندنا بلند دەربارەی چاوانییا سەرەدەرییا ل گەل رەوشا نها بلند نرخاند.
پشتی لسەرگەریانا هەمی پشکان و وەرگرتنا زانیارییان ل سەر ئاڤاهییێ مەلا مستەفا بارزانی یێ زانینگەهێ، راگرێ گشتی یێ زانینگەها ئەمریکی یا کوردستانێ بۆ شاندا لژنەیا خواندنا بلند یا پەرلەمانی دوپاتی ل پلانێن بەردەوامیپێدانا ئاڤاکرنا گەنجان و هەروەسا راگرتنا بلندترین ئاستێ ئەکادمی کر.
هەڤدەمی بریارا حکومەتا هەرێما کوردستانێ، زانینگەها ئەمریکی یا کوردستانێ ژ ئێکی مەها ئادارا ٢٠٢٠ێ دەرگەهێن ئاڤاهییێ خوە گرتن و دەست ب خواندنا ئۆنلاین کر.