حکومەتا ئەمریکا ٤ ملیۆن دۆلار ژ بۆ پشتەڤانییا شێوازێ ئەمریکی یێ خواندنا بلند ب زانینگەها ئەمریکی یا کوردستانێ دان
دهۆک، هەرێما کوردستانێ – ١٢ی مەها ١٠ – د کۆنگرەیەکێ رۆژنامەڤانی دا ل بەرانبەر ئاڤاهییێ موستەفا بارزانی، کۆنسولێ گشتی یێ ویلایەتێن ئێکگرتی یێن ئەمریکا، رۆب واڵەر، و د. رەندل رۆدز، سەرۆکێ زانینگەها ئەمریکی یا کوردستانێ وەرگرتنا ٤ ملیۆن دۆلاران وەک پشتەڤانییا شێوازێ ئەمریکی یێ خواندنا بلند ل ئیراقێ راگەهاند.
سەرۆکێ زانینگەها ئەمریکی یا کوردستانێ د گۆتارا خوە دا سوپاسییا حکومەتا ئەمریکا و گەلێ ئەمریکایێ کر و راگەرهاند: “ب دابینکرنا ڤێ هاریکارییا پێدڤی دێ پێڤاژۆیا خورتکرنا پەیوەندییێن مە و هەڤکارێن مە ل ئەمریکا و هەروەسا بەرفرەهکرنا شیانێن مە یێن دابینکرنا بەخشینێن خواندنێ بۆ پتر قوتابییان گەلەک ئاسانتر لێهێت.”
گۆت ژی: “هەروەسا سوپاسییا سکرتێرێ زانینگەها مە یێ دەستەیا ئەمینداران، د هونەر عیسا و راوێژکارێ گشتی یێ زانینگەها مە بۆ کاروبارێن دانپێدانێ، د. لی بەش، یێن کو ل گەل راگرێن زانینگەها ل سەر پێشکێشکرنا ڤێ هاریکارییێ کار کری، دکەم.”
د کۆنگرەیێ رۆژنامەڤانی دی هەروەسا دوپاتی ل مەزاختنا وێ هاریکارییا دارایی ژ بۆ بەخشینێن خواندنێ و تێچوویێن قوتابییان نوو، ب تایبەت یێن کەمینە، ژن و دەستکورتان هاتە کرن.
زانینگەها ئەمریکی یا کوردستانێ دێ ب ڤی پرۆژەی پەیوەندییێن خوە ل گەل زانینگەهێن ئەمریکی پێشڤە بەت و دەست ب گوهۆرینێن پێدڤی ژبۆ وەرگرتنا دانپێدانا ئەمریکی کەت.
د هەمان کۆنگرەیێ رۆژنامەڤانی دا، کۆنسولێ گشتی یێ ئەمریکا ل هەولێرێ ژی راگەهاند: “هیڤیدارم ئەڤ پرۆژە نموونەکا دی ژ گەهاندنا خزمەتا مە یا هەڤالینیێ بیت و هەروەسا پابەندییەک بیت ژ بۆ خەلکێ ڤێ هەرێمێ. ئەڤ وەبەرهێنانا ئەڤرۆ ئەم دکەین، ژبۆ سەرکردەیێن نڤشێ بهێت و پاشەرۆژا مە یا هەڤپشکە.”
ئارمانجا سەرەکی یا زانینگەها ئەمریکی یا کوردستانێ بهێزکرنا پێگەهێ خوە وەک ئێک ژ باشترین زانینگەهان ل سەرانسەری ئیراقێ و گەهاندنا مفای ب خواندنا بلند یا کوردستانێ ب گشتی یە.